SPEKBOOM – Die spekboom (Portulacaria afra) is ‘n vetplant met kleinerige blare en staan ook bekend as die “Waterwys Plant”. Hierdie boompie het baie min water nodig om te groei en daarby is daar min insekte wat die plant vreet. Die spekboom is immergroen en word ongeveer 2,5-meter hoog. Die stam, wat tot 20 cm dik word, het ‘n kurkagtige voorkoms.
Dit groei maklik van stiggies of takke wat afgebreek word en in die grond gedruk word. Hulle is nie indringer plante wat vervuil nie en hul wortelstelsel hou ook nie ‘n bedreiging in vir geboue soos geboude omheinings, huise of ander permanente strukture nie.
Mense maak ook lanings van die plant wat ook kan dien as skeidings tussen huise om privaatheid te skep. Hulle kan ook as huisplante en potplante aangehou word en is immergroen. In die huis soek hulle net skerp lig. Mens kan die spekboom ook in potte plant, in rotstuine en in vlak grond waar daar baie klippe is.
Mens kan ‘n spekboom na hartelus enige tyd van die jaar snoei en hulle maak ook pragtige bonsaiboompies. Hulle help ook soos alle fotosinterende plante om lugbesoedeling teen te staan deur koolsuurgas (koolstofdioksied) uit die lug te onttrek en om te skakel na suurstof en koolstof.
Die spekboom dien ook as voedsel vir diere en kan verskillende wildsoorte lok. Die blare van die spekboom kan deur mense geëet word. Dit kan in tye van nood as ‘n voedselbron aangewend word en is ook geskik vir gebruik in slaaie. Die blare het ‘n effens suur, suurlemoenagtige smaak.
